Efsaneya Werzan

                                    Ji bo zarokan
 
Hebû nebû
Hêşta kes ji me nebû
Ev cîhan
Depekê şanoyê bû
Çar ekter
Bi rêz hatine ser
Zivistana berfîn
Buhara rengîn
Havîna zêrîn û
Paîza nazdar û nazenîn
 
Zivistanê
Kaxezeka spî
Ji berfa xwe çê kir û
Da destê buharê
Buharê
Bi tiliyên xwe
Kire çîmeneka şîn
Tijî kulîlkên rengîn
Havîn hat û
Hemî çinîn
Hemî di ber kezî û biskên xwe ra kirin û
Rûnişte bin sîbereka hîn
 
Paîz sil bû
Xwe di axê veda
Bû toz û hirr û ba
Kire girî
Bu teqn û herî
Paşî dest da meqesa xwe û
Kezî û biskên havînê
Di binî ra birîn
Esman tûre bû
Birûskek rahêla û got:
„Dubare bikin,
Ev lê nebû!“
 
Ji hîngê were
Şanogeriya van ekteran,
Her eve ye
Ji hîngê were
Em bînerîn û
Bihayê dîtina her carekê
Salek ji temenê me ye.
Û hosa
Zarok mezin dibin
Mezin pîr dibin
Pîr jî
Vê çîrokê bo me dibêjin:
 
Hebû nebû
Hêşta kes ji me nebû
Ev cîhan
Her hebû
Her ev bû.
 
                        Engere
                        18/6/2018

 

Çavkanî: Mueyed Teyib: Gemiyek li Nav Biyabanê. Wêșanên avesta, Stembol 2019, Rûpel: 211-214

Helbest

Wek her car
Derengî şevê dihêt
Wek her car
Min ji nav cihan dihîne der û
Heta berê spêdê
Nahêle ez binivim
Ez nizanim
Kengî û çawa di xew diçim
Lê dema roj
Werîsekî li esmanan bilind dibe û
 
Xuh bi cêhnîkên pencera min da dihête xwar û
Ez çavên xwe vedikim…
Kaxezeka li ser balgehê min hêlay
Wek zeviyeka genimî
Li ber tava buharê
Guliyên xwe dayne bay.
 
                        Dihok
                        10/11/2018

Çavkanî: Mueyed Teyib: Gemiyek li Nav Biyabanê. Wêșanên avesta, Stembol 2019, Rûpel: 141-142

Şervanekî winda

Li Farqînê, kalemêrekî şeht,

pişta xwe dabû dîwarê kela Zembîlfiroş

tûrikê titûna wî li ber wî bû

Qelûna xwe dadigirt û digot:

Ji we heye ev titûn e

Ev biskên kezîzerên çiyayê Kurmênc in

Ji we heye ew qelûn e

Ev kezeba dayika min e ku ev 5000 sal in li ser min dişewite

Ev ne dîwarê kela Zembîlfiroş e

ne jî dîwarê zindana Amedê ye

ev xewn û hêviyên şikestî ne ku bûne

dîwarê poşmanî û girî.

Ey dîwaro

dîwarê şeva min a têkçûyî

şeva tî, şikestî, vêketî

her kevirekî te, mirinekî min e

Hingî hatime kuştin, min rojbûna xwe ji bîr kiriye

Hingî têm kuştin, nema karim gorên xwe yên winda

bihêjmêrim.

                                   Bismil – Amend

                                   13/4/2015

Çavkanî: Hoşeng Osê: fîncana jehrê, Ji rojnivîsên şervanekî winda. Wêșanên avesta, Stembol 2017, Rûpel: 33-34