HEZAR Û YEK

Ji bona ji te hezkirinê

Sedemek tiqûtenê,

Lê hezar û yek hene

Ji bona nehezkirinê.

Ew yek,

Girantir davêje di mêzîna dil

Ji hezar û yekê dinê.

Gelo teraziya dilê min

Ne li saz e? An jî

Eqlê min hêsîr e, ji pejnan ra.

Lewra

Ne maqûl e, ku

Hezar û yek siviktir bin ji yekê,

Û yek ji hezar û yekê bêtir.

Çavkanî: Rojen Barnas: Milkê Evînê, Wêşanên Nûdem, Stockholm 1995

BIHAR

Gava dinê dibe bihar

Dibişkivin devî û dar.

Zozan têne gihartin zû

Mina cilên bûkên di nû.

Nêrgiz, sosin, kulîlk û gul

Direvînin xeman ji dil.

Dinya dibe wek gola şîn

Çîçek didin sed rengî bîn.

Xesma siban berbangê zû

Tev radibin ew teyr û tû.

Vêk ra dikin şahî û saz

Hişyar dibin hulîlk û baz.

Bilbil dibe dengbêjê wan

Dikit qîrin ji dil û can.

Pîroz dikin rojên di hev

Hin xweştir e biharê şev.

Çavkanî: Osman Sebrî; Dîwana Osman Sebrî, Berhevkar: A. Bali. Çapa duwemîn, Stembol 2004