EZ Û TU

Tu av î

ez kanî me

tu xwîn î

ez tamar im

tu mêjî yî

ez serî me

tu roj î

ez tîrêj im

tu beng î

ez bengî me

tu nebî

ez li ku me

Çavkanî: Raif YAMAN; Xewna Avê, Weşanên Pêrî, Stembol, Rezber 1998

ŞEMITÎNA STÊRKAN

Ku şemitîna stêrkek

Nimaya mirina yekî mezin be;

Herşev ji esmanê me

Stêrk dişemitin bê hejmar.

Ne bêsedem û beyhûde ye,

Ku hêvîdarên siberoj in, em.

Me welatek wer zayok heye

Ranaweste li ber rihsitîn tu car.

Neşemitin stêrk! bêsedem,

Nexuricin bê şop û bê ronahî.

Xuricîna we, divê azahî.

Tov ke li dû xwe, bi kerem.

Çavkanî: Rojen Barnas; MILKÊ EVÎNÊ; Weşanên NÛDEM, Stockholm 1995

sibe Newroz e

hêvî ne libên tizbeha min

ta, ji sebrê semax e

qutîya min mişt tûtina qaçax e

bîhna Helhelê ye

diçe û tê

û difûre bi qevzên min re li hepsê

sibe seredana min tê

qewitîya nêrgizekê kirime

û gotime bîne

hûçkên kirasê xwe de

kevir

pîşo

û heste!

sibe Newroz e!

Çavkanî:  Arjen Arî; ramûsan min veşartin li geliyekî, Wêşanên Avesta 2000, Stembol

ŞÎNA ZAROKÊN LI HELEPÇE HATIN QETILKIRIN

Hun wisa dilgeş û kamran in ku îdî

Tevkujîya zarokan jî nikare we xemgîn bikê

Ma ne em bûn ku me nalîna mezlûmekî

Zelzeleke cîhanî qebûl dikir ji bona herkesî

Berê mirî nefesa xwe ya dawî didan û dimirin

Li Helepçê zarok ji vê jîhatin mehrûmkirin

Dayîkno we çima em nefetisandin hengama welidandinê

We çima em mehkûm kirin ku em bibînin vê rezaletê

Ew ku çîya nikarin rahêjin vî barî, ma çawa

Wê rahêjin milê me van hemû tabûtan bi carekê

Hîroşîma, Veyetnam, Efxanistan, Filistîn

Têr nekir xwîna zarokan Dehhakê demê

Heyf e ku em bi qasî Kawa jî nehatin ku Kawa mir

Lê Dehhak hezeran Dehhakan welidand bi carekê

Bila bigrî welatê Selahaddînê binavûdengê min

Bila bigrî Qudsa Ezîz li ser vê qederê

Gelo em çawa dijîn di bin vê zîlletê de çawa

Mîna keriyek kerr, keriyek lal, keriyek kor

Bila di mejiyê me de rabê qîyamet eger wê rabê

Yan raperînek birûmet, yan bila tevkujîyek giştî biqedê

Gulan 1988

Çavkanî: Sabah Kara; MERSÎYEYÊN ROJHILAT. Çapxaneya Nûbihar, 1998 Nîsan, Stembol

helepçe

Çardeyê mehê bû

Li ser Goyjê

ba qelema min firand.

Dema min dît û pê nivîsî

kom kom firîyan peyvên min.

Panzdeyê mehê bû

Sîrwan qelema min bir

Çaxê min girt û pê nivisî

Bûn masî helbestên min

Şanzdeyê mehê bû

Ax şanzdeyê mehê!

Ku Şarezûr qelema min wergirt

Dema vegerand ku ez binivîsim

Wek Helepçe hişk bûbûn tilîyên min.

Çavkanî: şerko bêkes; ji nav şiîrên min, Wêşanên Avesta, Çapa Duwem 2001, Stembol. Wergera ji Soranî: Rûken Bağdu Keskin, Bedran Hebîb

DIL

Bila nexweş nekevê

Ti dem zarokê sêwî

Bila yê min bin, yê min

Qeza û belayê wî

Xemên wî bila yê min

Nexweşîyên wî yê min

Û hemû şahîyên min

Bila bibin malê wî

Neyê birrîn dengê wî

Neyên girtin çavê wî

Bila bigrî, jenga dil

Pak dikin histêrê wî

Di dil de bayê sibê

Kenê zarokên wisa

Xwezî ew destên biçûk

Min şev û roj ramûsa

Sibat 1981

Çavkanî: Sabah Kara; MERSÎYEYÊN ROJHILAT. Çapxaneya Nûbihar, 1998 Nîsan, Stembol