ŞEMITÎNA STÊRKAN

Ku şemitîna stêrkek

Nimaya mirina yekî mezin be;

Herşev ji esmanê me

Stêrk dişemitin bê hejmar.

Ne bêsedem û beyhûde ye,

Ku hêvîdarên siberoj in, em.

Me welatek wer zayok heye

Ranaweste li ber rihsitîn tu car.

Neşemitin stêrk! bêsedem,

Nexuricin bê şop û bê ronahî.

Xuricîna we, divê azahî.

Tov ke li dû xwe, bi kerem.

Çavkanî: Rojen Barnas; MILKÊ EVÎNÊ; Weşanên NÛDEM, Stockholm 1995