Ew e Jiyana Te!

Ey şeva mina tarî,

Tehdidên gur û rovîyan,
Ji tarîtiya te quwet girtin.
Tirs û xofa min jî,
Bû hoparlora dengên wan.
Ew qêriyan,
Ew kuziyan,
Ez tirsiyam.

Wexta ronahî hat,

Tarîtî wenda dibe.
Gur û rovîyan jî va wusa dizanîbûn.
Lewma ji min re gotin,
Çavên xwe bigre û qet ve meke!

Her çiqas ku dengê dilê min,
Şevaqê lêxistîye, çavên xwe veke,
Tarîtî qeder nîne, digot jî;
Tirsonektiyê tarî kiribû dunya min.
Tehdîdên zaliman jî,
Jiyan didan xofa min.
Ji tirsan guhên min nedibîhistin,
Gaziya dengê dilê min.
Zordestîyê perde xistibû
Ber ronîya çavên min.

Dengê pak bê sedem diyar nedikir,
Qet tu kes,
Qasî însanên nexwezin bibînin kor;
Tu kes jî,
Qasî însanên nexwezin bibihîsin kerr nînin.

Ronahî û tarîtî,
Kîjanî dixwezî;
Ew e jîyana te!
 

            Hesen Polat

            26 ê Adar a 2002

            Hamburg / Elmanya

Sêdar

                                   Dîyarbekir 1925

sêdar,

ew darên mirinê,

bi kindir, zirav û berz.

sêdar,

li erdê dagirkirî,

bi destên bêbextan rastkirî.

sêdar,

mengeneyên mirina sar,

mirina xof û dijwar.

sêdar,

kujarê azadiyê.

sêdar,

sebebê rondikên zelal.

sêdar,

ezraîlê bi destê insanan çêkirî.

                                               1997

Çavkanî: Serdar Roşan; Bazên Welat, Stembol 2005, Weşanên DOZ.

serê sibê

ev bajar di bin bandora civîkan de

bê hiş…

û gêj…

li taxên mirtiban bilind dibe dengê dîkan

car caran se direyin

serê vê sibê…

rojê xwe hilavêt di şahiya civîkan de,

serê sibê

li vî bajarê stûxwar

min xewnek dît

xewnek ji xewnên

bi kesera dîtina yara qemer

ewrên zêrîn û gewr

mîna pêlên behreke rawestî belav bûn,

li pêşqabilê trêjên rojhilat.

ew bajar bêdeng

ez di kesera evîna qemer de dilbirîn

serê sibê…

min xewnek dît.

            Tîrmeh 1999

Çavkanî: azad avci; dilopên nîsanê, Stembol 2008, Wêşanxana Komal.