şev û roj

ez berbiqa li ser avê me

                li ber windayînê me şev û roj

di nav biqebiq û bijiqînê

                li sere peqîyanê me şev û roj

li devbehr û deravan

                li devçem û nav pêlan

                               li newal û çiravan

                                               li ser alaş û pelan

                                               di bin tara jîyanê

                                               dipifim bi şahî û janê

sal duwanzdeh heyam e

berbiqa li ser avê me

hew dixûyêm û dibim berze

nav li min tev sirr û raz e

ketime nav melhezê

                digezgezim şev û roj

ez finda li bin agirê me

                diçirisim li ber bayê wextê gûzan

li serê vemirîn û temirînê me

                bi ta û girozû li payîzan

kevirekê gêr û girovel im

                hatime avêtin li banê dêrê

ber bi ketinê ve çavsilûvil im

digindirim şev û roj

cemeda li ber şîqa tavê

                barûpiştîyê umrê min e

ez im derwêşê bexdayê

semyan dihele û dinizile

hişk û zuwa dibim

                û dibim çend beyt û qewl

têm ziwêrandin şev û roj

ez berbiqa li ser avê me

hevqedera qeşa û findê me

didanim li eniya kevirê ketî

diteqim li bal tefîna cemidî

ez dilopa li nav avê me

dibiqbiqim şev û roj

hilavêjê li rûyê davê me

li ber mirinê me şev û roj

                                                               gulan2011wan

Çavkanî: Sidîq Gorîcan; Şev û Roj Berbiqa li ser avê me, Stenbol 2012, Weşanxana Nûbihar